:: aseer el 7ob ::
رئيس الاداره
عدد الرسائل : 154
العمر : 33
تاريخ التسجيل : 28/09/2007
 | موضوع: شَوٍفْ عّقٍبَكِ حَبٍيبَي كِيًفِ آصّبَحِ زْمٍآنٍيِ ((بقلم :Q8  السبت سبتمبر 29, 2007 12:10 pm | |
| 
شلونكم شخباركم ؟
عساكم بخير ؟
احم احم بعد جم سنه من القراءة و البجي على عدة روايات
و حسيت ان ممكن انا بعد اكتب
ليش لا ؟؟
+ تشجيع صديقتي العزيزة العضوة sali_29
قررت اكتب روايه بعنوان
شَوٍفْ عّقٍبَكِ حَبٍيبَي كِيًفِ آصّبَحِ زْمٍآنٍيِ شٍوَفٌنٍي كِلُ لٍيِلهُ مِنً فَرًآقُكِ شًكِثَرٌ آعَآنٍيِ
الروايه بيني انا و سالي
هي تعطيني افكار و تشاركني
و انا اترجم و اكتب بالكويتي 
نظرا لأن صعب عليها بعض الشي ان تتقن اللهجه
فـ ( ربعٍ تعاونوا ما ذلوا ) صح ؟
المهم
كتبت و وريت سالي و هي تقول ضيفي و غيري و زين و اوكي ولا و :@ اعصاب انا وياها
و هذا مو عاجبني و هذا عاجبها
و هذا شنو اسمه و هذا شنو بيصير له
و الــــــــــــــخ
خخخ
بس عدت السالفه على خير
و ليلحين حلوين و طيبين مع بعض
المهـــم
هذا الجزء الاول من الروايه
و كل اسبوع ان شاء الله بنزل جزء
و تحديدا كل اربعاء
طبعا انا قبل على بالي السالفه سهله
و اعصب اذا مانزلوا الاجزاء بسرعه
بس والله تعب و يبيله مزاااج و خلق
+ تفكير
الى الان مافي وايد بجي
و الى الان ماخلصتها طبعا
و بس المطلوب شويه تشجيع و متاابعه
بــــس هذا المطلووب
و بسم الله بدينا بأول جزء
محمد :رغوووود رغووود يلا خلصينا بتيين و لا ارووح عنج :@
رغد : اوف انزيين انزيييين الواحد يعني مايتكشخ برااحته
محمد : ماصارت كشخه ذبحتينا و بعدين يعني الحين احنا من كثرنا علشان نروح الزواره على دفعتين
دفعه امي و ابوي و اليهالو و دفعه انا و الاميره رغد
رغد : :$ تصدق لايق علي اميـــــــره يااحلــــــوي والله
محمد : هيييه لا تصدقين و خلصيني جدامي
رغد : وااي انزيــــــــن ,, بس ماقلت لي شرايك بشكلي
محمد : تهبلين بسم الله عليج اقري على نفسج عن العين يالغاليه
((فديتك والله توك تزفني و الحين خايف علي و تبيني اقرا على نفسي ))
رغد : ان شاااء الله
محمد يشوف ساعته : يلاااا تأخرنا
رغد : أي صح ,, خلاص اســـــــفه يلا كلها جم اسبوع و ابوي بيطلع لي الليسن و السياره
محمد : أي والله و نفتك لان انتي بروحج يبيلج واحد مجابلج يوديج و اييبج
توني احس بمعاناه راجو الله يذكره بالخير
ماالومه لأنه قب و ساافر من كثر مشاوريج
رغد : هاهاهاها سخيييف لا تخاف بتفتك مني و ماراح اثقل عليك و لا اتعبك بعد مااخذ الليسن
محمد : لا تزعلين مني ,, و بعدين انتي مو ثقل و لا شي بالعكس عســل على قلبي و تعبج رااحه لكن تدرين
انا مو فاضي طول الوقت و مشاويرج انتي وايد و بعدين لا يكون على بالج من اول يوم بتاخذين الليسن
بنعطيج السياره و يلا ياحلوة روحي على كيفج
رغد و هي تدخل السياره : ياسلام عيل متـــى بتعطوني السياره و تخلوني على راحتي
محمد : بعد ما نتأكد انج متمكنه زين من السواقه و تدلين الاماكن المهمه عدل و ماتضيعين و بعدين احنا نخاف عليج
انتي لو تشوفين العالم و المينن الي بالشوارع ترتجفين من الخوف
رغد: بعد عمرري والله الي يخافون علي صح كلامك طبعا انا ماينيت علشان على طوول اسووق
و شغلت رغد على محطه مارينا و كانو حاطين دلوني درب السنع وينه لميامي اعتقد سامري مطور
و تدري بأخوها يحب سوالف العتــــــج
رغد : اهداء الى احــلى اخوو
محمد استانس و اندمج
رغد عمرها 19 سنه و سنه اولى في كليه الهندسه
حبوبه و طيبه و خوش بنيه و حساسه شوي بس مرات تحس ماتعرف تتصرف او تتهور و مرات تكون عاقله و حكيمه و تتميز انها سنــــــعه و الحلو الي فيها ان لها اهتمامات في جميع المجالاات الديني و السياسي و الرياضي و الفني و التكنولوجي يعني بتاااع كلوو
عشقها غرامها المنتديات و المسنجر
محمد اخو رغد و عمره 20 سنه و بكليه علوم اداريه حبوب و طيب و خدووم و يحب البيت وايد او اكثر شي يحب الي في البيت يحب قعدات الاهل مو وايد يحب يطلع و يهيت بالشوارع نفس شباب هاليومين كان نفس شباب هاليومين بس تغير و صار ريــــــال يعتمد عليه و ذراع ابوه اليمنى و ريال البيت بالطريقه الصح مو بالتسلط و السيطره و " انا ريال البيت امشي خواتي على كيفي " لا مو جذي
لما وصلوا بيت يدهم الله يرحمه للزواره
دخلوا و لا كل العايله متيمعين على الطاوله و باديين اكل
و التفت خالهم خالد و قال : لاااااا حلفوو تو الناس جان ماييتو بعد
محمد : بعد بنت اختكم ماتعرفونها
خالتهم نوره : أي بعد رغود بـــــارده و لازم التاخير
طبعا رغد متعوده على هالحجي و مالها شغل بس باست يدتها على راسها و قعدت على كرسيها و بدت تاكل
شيخه : احلــــــــــــى طاااف تعجبيني
جاسم ولد خالها خالد : انزين استحي على ويهج و سلمي سيدا رحتي و كليتي
رغد : لو سمحتوا لا سلام و لا كلام على الطعام و مو كافي ان ماشاء الله عليكم مخلصين علي نص البلعه
ام محمد (ام رغد) : بس عاد لا تتحرشون ببنيتي حبيبتي والله بعد عمري ماتاكل عدل الا بهالزواره
يا تاكل من مطاعم يا تطنش من دخلت هالكليه
ابو محمد : أي بعد عمري ترجع و منهد حيلها و بس حياتها على هالكافيين ياجاي يانسكافيه ياهوت شوكليت
رغد : شسوي بعد مو بكيفي
مها (اخت رغد ) : عشتووو ابوي يقول بعد عمري و امي حبيبتي و احنا اصفاار على الشمال هااا
ابو محمد : والله كلكم حبايبي و بعد عمري مشكلتكم ماتعرفون قدركم بقلوبنا
رغد : عارفينه عارفينه يايبا بس حجي و نبي كلمتين حلوين يبينون غلاتنا بـــــــس
الكل : أي بــــــــــــــــــس
و ضحكوو
بعد الغدا
طبعا كل فئه قعدوا بروحهم الحريم بالصاله و الرياييل بالديوانيه
البنات بروح و اليهال بروح
يعني جروبات علشان الكل ياخذ راحته
خصوصا ان البنات مايحبون تعليقات الحريم عليهم و بنات اخر زمن و من هالحجي
جروب البنات كانو
نورة و شيخه و رغد و مريم و هلل و مها
نورة تصير بنت خال رغد (خالد )
شيخه بنت خاله رغد ( نورة )
مريم و هلل بنات خالة رغد (دلال)
و مها اخت رغد
يعني رغد عندها خالتين و خال (نورة و دلال و خالد)
نورة عمرها 19 كبر رغد بينهم جم يوم
بس و لأن نورة عيد ميلادها قبل 15-مارس
جدموها سنه فسبقت رغد
و انقهرررت رغد
و نورة مسميها ابوها على اخته
بعد كليه هندسه بس ثاني سنه
و هي الوحيده بين 5 شباب اخوان و امها متوفيه
يعني هي الانثى الوحيده بالبيت مو اذا حسبتوا الخدامه بعد يكونون 2
;p
شيخه وحيده امها و عمرها 17 رابعه ثانوي
و ناويه انها تييب نسبه سنعه علشان ترفع راس امها فيها و تفتخر فيها و تقول
" هذي تربيه المرا اذا مو عاجبتكم " حق عماتها و ابوها لأن ابوها منفصل عن امها و كان يبي الحضانه لأن تربيه المرا مو شي و لازم البنت لها ريال يسنعها و يربيها بس بعد ما اقنعوه و حاولوا فيه خلوا ام شيخه تاخذ الحضانه
شيخه بنوته حساسه و مدلعه عالاخر بس عندها حس مسؤوليه
ايضا فيها شويــــه مزاجيه + انها تحب ان الغير يهتم فيها مو لدرجه انها تعتمد على غيرها لا انه يهتم فيها
شيخه غرامها القراءة كل شي جدامها تقراه
و تموووت على الروايات الي تكون باللهجات المحليه
مريم اكبر منهم عمرها 20 و هي اكبر حفيده(من البنات) بالعايله و سميه اليده علشان جذي يدتها وااايد تحبها
و هي بكليه التربية الاساسيه لغه عربيه
ماتحب العربي وايد بس هي لما تخرجت
قدمت على كل شي و الي يقبلها قبل !!
فصارت من نصيب العربي
مريم بنت شويه اثقل من باجي الشله بس مرات عليها سوالف و فصلات مو طبيـــــعيه
يعني يا هاديه يا فاصلـــــه و بقوووه
هي اكثر وحده تستحي من بين البنات اما اذا كان معاها احد عادي مو وايد
متعتها الطبــــــــخ
اذا عصبت او ملت او حزنت
الطبخ هو الي تلجأ له و تحب التسنيع
هواياتها الطبخ طبعا و التلفزيون
و ماتحب النت بس اجبروها البنات انها تسوي ايميل و تدخل المسنجر
خصوصا انها سايق الشله على قولتها فلازم تدخل و يجتمعون يخططون للويك اند
و بس تنطر أي وحده فيهم تطلع ليسن علشان تفتك لأن جد مرات تعصب تقول اووف ماعندكم اخوان ماعندكم ام و لا ابو توديكم كله مريم مريم مريم
مسكيـــنه بس مع ذلك طيبه و تروح لهم و توديهم المكان الي يبونه
ليل صبح ظهر
ماعندها مانع
: )
هلل و مها اعمارهم 15 مواليد الغزو او نقدر نقول التحرير على قولتهم
قبل كانو البنات مايحبون ان هلل و مها يقعدون معاهم
لأنهم كبار و يعتبرون هذيلا صغار : \
او يهال
بس حصلوا جم زفه من الكبار و انضموا غصب للشله
و صارو جزء منها و عادي الحين مافي فرق بالعمر
خصوصا ان مها وايد تضايقت لأن رغد كانت تعاملها كأنها ياهل جدام البنات و تعاملها بالبيت كأعز رفيجاتها و انها كبيره
بس بعد الزفه و العتاب من اختها عدلت معاملتها و ضمتهم للشله
مها عنيده جدا و مزاجيه تقول لها يمين تيي شمال تقول شمال تيي يمين
لازم العناد اذا تبي شي منها قولها العكس و تسوي الي تبيه
يعني عنيده و راسها يابس و مزاجيه
بأختصار (( المراهقه المثاليه ))
((ذا بيرفكت تينيجر))
هلل هذي توأم روح مها كل شي تسويه مها معاها كل شي تقوله مها تسويه
يعني عادي جدا لو تقولها يلا ننتحر ترد عليها هلل (( شنق و لا من الدريشه ))
عادي جدا
حتى ان الكل شاك و قايل اخرتها بيتزوجون واحد علشان لا يفترقون
يا هذي نايمه عند هذي او العكس
هم فكروا يأجرون لهم شقه و يقعدون بروحهم بدال النوم عند بعض
و قرروا بروحهم كل شي كل شي
الماجله التنظيف الطبخ التوصيل بكــــــل شي
بس اختلفوا على الغرف و هونوا
خخخخ طبعا بروحهم و بكيفهم قرروا و هونوا و لا احد درا عن هوا دارهم
بس يعني خلاص اتفقوا اذا صارت اعمارهم 25 و ما يا النصيب
بيروحون بشقه وحده بس من الحين الى 10 سنين جدام
يصــــــــــــــير خير
المهـــــــــم
نيي حق هالتجمع
اخو شيخه من ابوها مرها بيت يدها علشان ياخذها زواره بيت اهل ابوها
اما باجي البنات ....
طبعا بهاليوم تيي فصله مو طبيعيه للبنات
هم كل يوم فاصلين
بس بهاليوم يكونون اووفر
هلل : رغوود رغوود صج الي سمعته
رغد : هلول هلول شنو الي سمعتيه ؟
هلول: رغود رغود الي سمعتــــــــــــــه
رغد : ايييييي
هلول : انـــــــــ
رغد : شنووووووو
هلول : يقووولون
نوره و مريم : ويعه خلصينا شنو يقولون
طالعوا بعض و ضحكوا
هلول : انزين انزين كليتوني
مها : يبا انا بقول ,, رغود صج شباب الهندسه حلوين يهبلون ؟ ؟
رغد تاخذ المخده الي يمها و تكفخ فيها هلول و مها
رغد : الحين صار لج ساعه على بالي بتسألين او بتقولين شي خطييير
اخرتها تسألين عن شباب الهندسه
مها : لا انا بصراحه قاعده اسأل عن شباب كل الكليات علشان على اساسهم بقرر مستقبلي
مريم : وااااي صج مرااهقـــــــــات و أي شي الحين بتحددين مستقبلج على اشكال الشباب الي بالكليه ؟
مها : عدااال يالكبيره كنتي عاقله و ثقيله بمراهقتج و لا سيدا من الطفوله الى النضوج :@
رغد تساتسر مريم : اقوول سكتي عنهم و لا ترا يطلعون كل فضايحج و احنا ماراح نقصر بعد
مريم : احم احم لا انتو كبار و حلوين و تهبلووون بعد
مها و هلل : ايي فديـــــتنا والله
رغد : عشتــــــوو قامو يتفدون ارواحهم
مريم: هههه معذورين ماعندهم احد يتفداهم
و سولفوا البنات شوي بس رغد طارت بتفكيرها بعييد و سرحت
نورة و مريم لاحظوا
نوره : هييييييه الووووووو
رغد: هاا ,, شنوو ؟
مريم : لا بالله البنيه مو معانا كلـــــش
رغد : لا معاكم منو قال
نورة بجديه : رغد شفيج ؟ شسالفتج ؟
رغد: مافيني شي
نورة : مو مصدقتج قولي قولي شفييج ؟
رغد : اووف لازم اقولكم مااعرف اخش عليكم شي
نورة : افا يعني خاشه شي
رغد : أي : \
نوره : و مو ناويه تقولين
رغد : امبلا بقول
نوره و مريم : يــــــــلا شتنطرييين
طبعا هلل و مها راحوا عند الحريم شوي يغيرون جو على قولتهم
رغد : بنــــــــات
نوره و مريم : نـــــــــعم
رغد : طحت طيحه و لا لقيت الي يسمي علي
نوره : وييي بسم الله عليج بعد عمري شفيج وين طحتي و شلون تعورتي ؟!!؟؟؟
مريم : نوووروووو شفيج مو طيحه طيحه طيحه من نوع اخر .. كملي شسالفه من اولها الى هذي اللحظه
رغد : انزين سمعووو
نوره و مريم منتبهين عدل و مجابلينها
رغد: هههههههه اشكالكم تضحك
تغيرت ملامحهم للعصبيه
رغد : واي يما تخرعوون
خلاص خلاص بتحجى
بس لا تشووفني جذي
خلصينــــــــــــنا :@ بعصبيه مريم و نوره
رغد : انزين بتكلم سمعوا
الله يسلمكم و يخليكم هو واحد معانا بالكليه خريج يهبل و اينن مابيني و بينه و لااا شي بس نظراته كانت كالسهام على قلبي
البنات و هم مو مقتنعين اهــا و بعدين
رغد تكمل
هو مابينا شي بس مجرد تلميحات و نظرات و بسمات منه و رقم
مريم : بــــــس
رغد : أي بس
رغد تكمل : وااي والله يهبل شحلاته اول مره احس اني احب اول مره احس ان في واحد يعجبني
و الاهم اني عجبته
تخيلوا قمت اروح الكليه بنشاط بس علشان اشوفه
لأن اذا شفته احس احس بشــــي غيـــــر
احاسيس و شعور غيــــــر
آهــ خذا عقلي و قلبي و روحي
قمت اسرح دايما و ما اركز : (
بس والله لا تلوموني يهبـــل
بس حســـــافه هذي اخر سنه له بالكليه ماراح اشوفه بعدها
اهئ اهئ : (
والله من عرفته و حسيت بهالشعور و انا احس اني بعالم ثــــــاني
احلى من العالم الي يتكلمون عنه الافلام و الاغاني بعد
و طبعا اكثر شي اسرح فيه لما احط ميك اب و اشوف ويهي بالمنظره و محاضره دكتور الملل و بالسياره و انا اشوف الطريج
و قبل لا انام و اذا قعدت من النوم و اذا كليت و كل وقت و كل ثانيه افكر و اسرح فيه
يمــــا قلبي
آهــ لو تشوفون شكله
و وسامته
و نظرته
و بسمته
و طوله
و هو كاشخ
و هو دايخ
و هو تعبان
بكل حالاته يهبـــــل
يعني لو خذيته بدعي ربي انه عيالي يطلعون عليه بنسبه 100%
حتى و هو معصب يهبل
و هو متضايق يهبل
آهـ يهبـــــــــــــــل << شوي و تصارخ
مريم : بس عاد فضحتينا سكتي
نوره سرحانه و موعاجبتها السالفه و رغد تكمل وصف عن الحبيب المزعوم و مريم تسمع و ببالها سؤال
نوره فجأة : قصدج بدر الفلاني صح ؟
سكتت رغد و على طول مريم سألت : منو هذا ؟ و بعدين انتي بس لا تكملين عن شكله ابي اعرف شسمه و ولد منو و شخصيته سمعته مايهمني سوالف طويل قصير و لا غيره
رغد ســـــــاكته
نوره و مها : جـــــــاوبي
رغد : مممم أي هو بدر الفلاني وووو ,,,,,
نورة و عصبت : الحين مالقيتي الا هذا تحبينه :@
مريم ضايعه بالطوشه
نوره : معذووره صار لج ساعه بس توصفين شكله لأن مافي بشخصيته او سمعته شي زين ينذكر
رغد : بس بس و دمعت
نوره خذت نفس عميــــــق
مريم : بس رغوده لا تبجين و نوره قعدي و اهدي لا تفضحينا
و سحبت نوره من ايدها و قعدتها
مريم : انزين قولوا لي السالفه من اول
نوره : انا اقولج الله يسلمج هذا واحد خريج معانا بالكليه اول مادخلت حذروني منه و انا سويت نفس الشي و حذرت رغود
هو انسان ربي يستر عليه و على الي يقص عليهم
يعني نوع فاسد من الشباب كل يوم له شكل و كل يوم له صيده اذا مو اكثر و كل يوم اشاعه و كل يوم سالفه
كل بنيه جدامه لازم يجرب حظه معاها و ماعنده مشكله اذا تهزئ و لا ردت عليه عادي بس لازم يجيس النبض مع الكل
واحد مو مخلي احد بحاله الي مستورة و الي منتهيه اساسا و الي لها قابليه للانحراف الكـــــــل ربي يستر علينا و عليهم
مريم : هيييئ و هذا شتبين فيه ؟؟
رغد: و هي تبجي ادري ادري والله و ادري بس شسوي عجبني و اول واحد حسيته يلتفت لي
نوره : ياقلبي مو كل شخص يلفت نظرنا نحبه و لا كل شخص نلفت نظره يحبنا و بعدين منو قال انه اول واحد يلتفت لج
ممكن يكون اعجاب بس مااعتقد حب اعجاب لآنه معروف لدى الكل او الكل يتناقل اخباره و يهتم هو شنو مسوي و لا شنو لابس بس صدقيني مو حب
مريم : ياقلبي يارغد راجعي نفسج صدقيني هذا مو حب
نوره : صح كلام مريم
مريم : انا بعد حبيت و عشت احلام و بنيت دنيا بروحي مع الي حبيته هو اخو رفيجتي و كنت اموت فيه و بس اتمنى اشوفه لو نظرة من بعيد لا و بعد ضفته بالمسنجر و كنت بقوله ترا احبـــــــك وااايد بس بعد مااعرفه اكثر لكن تبينت لي شخصيته و كل يوم قام يطيح من عيني اكثر و حسيت اني انخنت او انجرحت بس بعدين عرفت ان هذا يسمونه حب مراهقه و اساسا مو المفروض ابجي و انجرح لأنه مادرا عن هوا داري اساسا و عقلت و تركت هالشي و ماقمت اهتم و لا افكر اصلا
نوره : صح كلام مريم
رغد : تصدقون اقنعتوني و ابتسمت ابتسامه عريضه
مريم : رغد شوفي اذا مااقتنعتي قولي مو تقولين هالحجي و من ورانا تستمرين بالهطريج بروحج
ترا والله احنا خايفين عليج
رغد : لا جد ,, و وعد مني لكم اني ماافكر فيه و لا اهتم و بعدين انا وراي دراسه و لازم انتبه علشان اكون احلى مهندسه رغد =)
مريم : أي هذي رغوده الي اعرفها
نوره : و مره ثانيه ياويلج اذا خشيتي عني أي شي فاهمه :@
رغد : هههه ان شااء الله يمه
نوره : لالا ,, انــــــا نوره تكونين انتي بنتي (( تاشر عليها من فوق لي تحت ))
رغد : اصلا حاصلج بنت مثلي
مريم : انزين على كل هذا منو الابو اساسا !!
هههههههههه ضحكوا البنات
في هذه الاثناء
جاسم دخل البيت بعد ماكان بالديوانيه و شاف محمد و شكله مزاجه مو شي قال الله يستر و راح له
جاسم : ها حمود شفيك مارجعت الديوانيه
محمد : لا توني كنت برجع
جاسم : اووكي انا ياي باخذ جاي ماشاء الله عيال خالك مدمنين جاي خلصوا المطاره كلها
محمد و ماله خلق : أي انزين ,,جاسم انا طالع سلم عليهم و يمكن ارجع بالليل باي
و خله محمد و راح
جاسم مستغرب !!
شفيه هذا شسالفته فجأه جذي تعومس !!؟
المهـــــــم انا بروح اييب الجاي =)
| |
|
